Sdaiefk

Коми-Пермяккез (буржык гижны коми пермяккез) — этӧ чудь-йӧгра отир.

Тӧдса XV–XVІІ вв. роч гижӧттэзын Камалӧн вывланьын важ оліссес шусисӧ "пермяне", "пермичи", "пермяки". Асьнысӧ нія шуисӧ комиöн "коми морт", рочöн "пермяк". 1925-ӧт воын, кӧр аркмис Коми (Пермяцкӧй) национальнӧй кытш, Кама ладорын важ олісь отир, кӧда вӧлі кытшыслӧн ыджыт торӧн, пондісӧ шуны асьнысӧ коми пермяккезӧн, мед не сорласьны аскодь нима отиркӧт коми зырянакӧт да Кама ладорын мӧдік йӧзкӧт, кӧдна топоним сьӧрті шусисӧ пермяккезӧн.

XVІІІ веклӧн пондӧтчытӧдз вылісь Камлӧн муэс шусисӧ Ыджыт Перемӧн. Мукӧд важ гижӧттэзын этія ним дынӧ содтісьлісӧ вежӧртӧтан кыввез "глаголемая Чусовая". XІV–XVІІ веккезын Ыджыт Перем босьтіс ас пытшкас паськыт муэз – Рытъявлын Кама ю пӧлӧн да сыӧ усян ваэз пӧлӧн, асывьявлын Ураллӧн иззэзӧдз, ойвылын Печоралӧн вылісь ваязсянь Чусты дынӧдз, лунвылын Чусва дынӧдз. Этія муыс вӧлі Эжва Перемся унаись ыджытжык, сійӧн сійӧ не весь шуисӧ басӧк да бытшӧм нимӧн "Великöй".

Медодз пондісӧ тӧдмавны Ыджыт Перемлісь муэсӧ Новгортісь йоз, кӧдна неӧтпыр ыстывлісӧ асланыс ушкуйниккезлісь дружинаэз ӧктыны вот да кучик. Недыр мыйись нылӧн лоисӧ мырддиссез – Ростов–Суздались да Мöскваись öксуэз.

XV векын вылісь Кама муэс быдсӧн пырӧны Роч канмуӧ. Канкарлӧн веськӧтлӧмыс одзлань вынсялӧ христианизация пыр, кӧда ковтӧг пыртӧм коми пермяккез коласӧ. Чердынын, Ыджыт Перемлӧн веськӧтлан карын, оссьӧ Изын Иоанн-Богословлӧн медодзза вичку.

Но 1460-ӧт – 1470-ӧт вося событиеэс мыччалісӧ – наместник да христианизация оз сетӧ Канкарись эксуэзлӧ Ыджыт Перемын вын. Перемись муэз вылӧ неӧтпыр уськӧтчывлісӧ Козанись да Сибирись ханнэз.

1558-ӧт воӧ Гым Иван сетіс корӧм грамота Сольвычегӧдаись промышленниккезлӧ да му видзиссезлӧ Строгановвезлӧ Кама ю пӧлӧн ассыввывся муэсӧ, мед нійӧ буржыка йитны Роч государство бердӧ.

Роч йӧзлӧн локтӧмыс да Кама дорӧ пуксьӧмыс осьтіс колонизация – паськалісӧ Роч государстволӧн муэз, вын-сяліс сэтӧн веськӧтлӧм, ёнмисӧ экономическӧй йитӧттэз.

Перемись муэз вылӧ роч колонизацияыс сьӧрас вайис лёк эксплуатация. Строгановвезлӧн муэс лоисӧ ыджыт крепостнӧй промысловӧй йитӧттэзӧн. Нія пуксисӧ асланыс муэз вылӧ, кытӧн паськыта видзисӧ внеэкономическӧй принужденнё, отсӧтсӧ босьтісӧ вотчинаӧн веськӧтіссезсянь. Коми пермяккес унаись лэбтісьлісӧ Строгановвеслӧ паныт. Медыджыт выступленнё крестьяналӧн вӧлі 1861-ӧт воӧ, кӧда паськаліс быдсӧн Иньва му пасьта. Губернияись газетын эз лэдзӧ нельки гижны эта йылісь.

Кӧркӧся вына легендарнӧй отир лоис великорусскӧй угнетателлез киын богатсялан орудиеӧн, сорласисӧ национальнӧй культуралӧн вужжез.

Важся олан дын нюжаліс ӧнняся оланісь ён шӧрт. Уралын важ олісь отирлӧн муэс кыскӧны дынаные наукаын уджаліссезӧс: археологгезӧс, этнограффезӧс, фольклористтэзӧс. Перем муэзлӧн дон йылісь бура висьталіс Д. Н. Мамин-Сибиряк: "Эстӧн сё эшӧ ловья важ олан, кӧда видзӧ ас пытшкас эпическӧй склад..."

Коми пермяккезлӧн важся вужжезісь отирлӧн вӧлі аскоддя искусство – медно-бронзовӧй пластика, мӧднёж – "Пермскӧй зверинӧй стиль". "Перем пода стильӧн" берсяыс, кӧдӧ адззисӧ Кама ладорын, лыддисьӧны ІІІ–ІX веккезсяӧсь.

"Пода стильлӧн" аркмӧм да пасысалӧм вылӧ мыччалӧ уна тор; важся отирлӧн религиознӧй представленнёэз, отирлӧн олан, удж да вӧр-ва тӧдмалӧм. Уна берсяыс – ош, кöр да быдкодь кайез вермисӧ вӧвны тотеммезӧн, а мукӧдыс поди вӧлісӧ увтырлӧн пассэзӧн.

Сёрӧнжык "пода стиль" лоӧ мӧдӧтчан берсян, мый висьталӧ увтырлӧн культтэз ӧшӧм йылісь, кӧднӧ вежёны увтыррез коласся антропоморфнӧй идоллэз, сёрӧнжык сійӧ пондісӧ шуны "перем пуовӧй скульптура".

"Перем пода стильыс" одзлань колис коми пермяккезлӧн изобразительнӧй творчествоын ыджыт пас. Сія бура тыдалӧ пуись керӧм берсяын. Пуись вундалӧм пода да кай-пӧтка ӧнӧдз баситӧны керкуэз да картаэз, пань-бекӧр да мукӧд берсятор.

Коми пермяккезлӧн гижан кыв, кыдз и коми зыряналӧн пондӧтчӧ Стефан Пермскӧйлӧн миссионерскӧй уджсянь, кӧр вӧлі керӧм коми алфавит. Но гижаныс эз паськав и XVІІ веклӧн помын ӧшис, причинаэс вежӧртанаӧсь.

1920-ӧт воэзӧ коми отирсӧ (зырянаӧс да пермяккезӧс) янсӧтісӧ да керисӧ кык торья му, сійон зорамӧны кык литературнӧй кыв: коми (пермяцкӧй) да коми (зырянскӧй). Аркмис коми отир понда историялӧн ыджыт неколана тор, но чужан вужжес пыр кыскисӧ ӧтамӧд дынӧ. Уна том коми (пермяцкӧй) гижись, кӧдна дзир пондӧтчисӧ гижны, 1920-ӧт – 1930-ӧт воэзӧ лэдзисӧ ассиныс гижӧттэсӧ Коми обласьлӧн "Коми му" да "Ордым" (ӧні – "Войвыв кодзув") газетаэзын да журналлэзын.

Коми пермяккезлӧн да коми зыряналӧн том отир и ӧні уджалӧны ӧтвыв наукаын, литератураын, культураын да образованнёын.

Коми-пермяцкӧй национальнӧй кытш аркмӧм бӧрын пондіс петны 1926-ӧт воӧ коми (пермяцкӧй) кыв вылын "Гӧрись" газета. Газетаын корреспонденттэзнас уджалісӧ том отир, мукӧдыс ны коласісь одзлань лоисӧ гижиссезӧн – Н. Попов, М. Лихачёв, С. Караваев. 1930-ӧт воӧ оссис Коми (пермяцкӧй) книжнӧй издательство, пондісӧ петны коми (пермяцкӧй) гижиссезлӧн книгаэз, лэдзисӧ сідз жӧ и литературно-художественнӧй альманаххез: "Дзульзян кай", "Бичирок", "Том ударник".

1991-ӧт воӧ бӧр оссис Коми (пермяцкӧй) сьыланкыв да йӧктан ансамбль (вӧлі подналӧм 1959-ӧт воӧ). Ансамбльлӧн репертуарас унажыксӧ пырӧны коми (пермяцкӧй) сьыланкыввез, орсаннэз да йӧктаннэз. Паськӧтіс ассис функцияэз коми (пермяцкӧй) кыв радиоын. 1991-ӧт воӧ радиовещаннёын оссис коми (пермяцкӧй) отдел. 1988-ӧт воӧ первуись кытшас оссис РАН, УрО, Коми НЦ-ісь, ИЯЛИ-лӧн общественнӧй наукаэз сьӧрті Коми (пермяцкӧй) отдел. 1990-ӧт воӧ оссис Россияись национальнӧй школаэзлӧн проблемаэз сьӧрті НИИ-лӧн лаборатория, кытӧн керӧны коми (пермяцкӧй) школаэз понда программаэз да лэдзӧны школаэз понда велӧтчан книгаэз.

Видзӧт сідзжӧ мӧд нёджӧв[мöдкодьсьöтны | править код]

• Коми-пермяккез
• Перем комиэз

Ӧшмӧссес[мöдкодьсьöтны | править код]

• Никитина Л. Коми-пермяккез
• Коми-пермяки (роч)