Sdaiefk

新民黨（英文：New People's Party），係香港建制派政黨，響2011年1月9號成立，主席係葉劉淑儀。

歷史[編輯]

2011年1月9號，新民黨正式成立，創黨黨員有266人，主要成員有葉劉淑儀、田北辰、史泰祖、陳岳鵬、黃楚峰、余衍深、屈奇安等。佢哋定位自己做代表中產利益同公務員利益嘅政黨。

2011年區議會選舉，新民黨派12人出選，結果4個人當選。之後有多個區議員都加入咗新民黨。

2012年，葉劉淑儀同田北辰分別帶隊出選第5屆香港立法會選舉香港島同新界西嘅地區直選，兩人雙雙當選。

2014年，史泰祖退黨。同一年，新民黨同公民力量（有「沙田執政黨」之稱）結盟，史稱「新公民同盟」。除咗立法會議員林大輝同區議員龐愛蘭（新論壇成員）冇跟住加入之外，其餘區議員都加入新民黨，與此同時，潘國山開始成為新民黨副主席。

2015年，趙哲妤、鄭承隆，陳嘉華先後退出新民黨。同年，新民黨派42人出選第5屆香港區議會選舉，結果有26人當選。新民黨喺好多地區都有突破，好似離島區噉。但係加盟嘅公民力量區議員就損失唔少，喺沙田區就有好幾個區議員落馬（包括楊倩紅、陳國添、黃澤標、何國華、李錦明、鄧永昌同埋羅光強），區議會議席比結盟後少5席。

2016年，新民黨派出葉劉淑儀、田北辰、容海恩分別帶隊出選第6屆香港立法會選舉嘅香港島、新界西、新界東地區直選，結果全部當選。選舉之後，兩個連任嘅議員各有進一步打算。葉劉淑儀多次喺公眾場合或明或暗講話想選特首。至於田北辰就打算競選立法會主席，不過同黨嘅葉劉淑儀冇支持佢，最終田北辰出選唔成，梁君彥就喺建制派拱照之下成為立法會主席。有傳田劉兩人因為噉而不和，甚至傳出田北辰會喺第5屆香港行政長官選舉之後退黨。同時新民黨打算叫謝偉俊加盟，準備交棒。

2016年12月15號，葉劉淑儀正式宣佈參選特首，但喺民調入面，佢一直係「包尾大班」，係民望最低嘅一個主流特首參選人。自從林鄭月娥參選之後，就連一啲支持開佢嘅選委都轉軚，例如：去過葉劉淑儀參選大會、新民黨顧問兼選委嘅盛智文就去咗支持林鄭月娥。結果葉劉淑儀喺2017年3月1號，宣布放棄第5屆香港行政長官選舉嘅競選工程。

2017年4月10號，田北辰宣佈同6個新界西區議員一齊退出新民黨，證實咗上年尾嘅傳聞。田北辰話佢同黨內另一個領袖葉劉淑儀有分岐係退出嘅主因^[1][2]。其後，田北辰另起爐灶，成立咗實政圓桌。

2017年6月20號，容海恩順利當選新民黨副主席，成功填補田二少遺留嘅新民黨副主席空缺^[3]，冇幾耐，已經冧莊新民黨主席嘅葉劉淑儀亦重新成為行政會議成員。2018年，黎棟國、韓世灝同時成為新民黨副主席。

2019年，新一屆嘅區議會選舉在即，但係區議員方面有啲人選擇退黨，繼黃宇翰喺舊年11月因為對馬料水填海立場同黨唔同而退黨，同區嘅林松茵同元朗區王威信都相繼退黨，令區議員數目由19席跌到16席。但係與此同時，葉劉淑儀希望挑戰區議會議席，據聞佢會落戶區議會「十朝元老」蘇炤成嘅三聖區去接佢棒，劍指2020年立法會選舉嘅超級區議會議席。

到2019年6月，政府推動修訂逃犯條例，引發軒然大波，身為行會成員嘅葉劉淑儀，因為成日代表政府同公眾推銷條例，兼且態度強硬，民望插水。同時黨裡頭嘅退黨潮持續，喺修例引發大型反對運動之後，西貢區譚領律、灣仔區李文龍同元朗區黃卓健先後「跳船」退黨，新民黨議席由16席跌到得返13席，連選超級區議會嘅門檻都唔過。

區議會議員[編輯]

新民黨喺5個區議會有13個議席，議員包括：

任內退出區議員

選舉成績[編輯]

立法會[編輯]

區議會[編輯]

參考資料[編輯]

1. ↑ 田北辰宣布退出新民黨 稱與葉劉理念有分歧，東方報業集團網站，2017-04-10
2. ↑ 田北辰：身份獨立後能暢所欲言，now新聞，2017-04-10
3. ↑ 政情：傻大姐容海恩 做新民黨副主席，東方日報，2017-06-21

睇埋[編輯]

• 匯賢智庫

出面網頁[編輯]

• 新民黨官方網站