Terremotu67 Bb NeJj zp Zz
In sa zeofìsiga, sos terremotos (dae su latinu “terrae motus”, est a narrer “moimentu de sa terra”), narados finas sismos o trèmidas tellùrigas (dae su latinu “Tellus”, diosa romana de sa Terra), sunt bivraduras o ossilladuras repentes, lestras e prus o mancu poderosas, de sa crosta terrenca, provocadas dae s’iscostiamentu repente de una massa rocosa in su sutasolu.
S’iscostiamentu naradu est zeneradu dae sas fortzas de creze tetòniga, chi assionant in manera costante in intro de sa crosta terrenca provochende s’ispossiamentu de enerzia in unu puntu internu de sa Terra naradu ipotzentru; moende dae sa fratura chi s’est formada, una filera de undas elàstigas, numenadas “undas sìsmigas”, si propagant a totu sas dereturas dae s’ipotzentru, zenerende su fenòmenu chi si notat in sa superfìtzie; su logu de sa superfìtzie terrenca postu in sa bertigale de s’ipotzentru si narat epitzentru e, in modo zenerale, est su prus pertocadu dae su fenòmenu. S’arrampu de sa zeofìsiga ch’istùdiat custos fenòmenos est sa sismolozia.
Sas istrussiones bàsigas in casu de terremotu sunt sas sighidoras:
- mantenzat su sussegu;
- s’arrimet a suta de una mesa pro èvitare de esser còrfidu dae ozetos e fratamaza (amentet chi sos terremotos non sunt bastante isprosivos pro frumbulare sos ozetos a foras de sos parastazos, los faghent petzi ruer a inghìriu);
- no impreet sas iscalas: sunt s’istrutura prus bidrina de sa domo;
- no impreet s’assensore: si diat poder brocare pro farta de eletritzidade;
- sigat petzi sas istrussiones de sa proteghidura tzivile e iscunfiet de sas noas no ufissiales;
- no impreet su telèfonu si no est netzessàriu astrintamente: si diat poder imbarare sos chi tenent bisonzu a beru.